MUDJER DI MIGRANTI

Shintadu mó na quexada

Ta cuda maridu na strangeru

Hómi sem medu d’inxada

Qui coba regu na tudu canteru

//

Fidju di Tchón Bom di Mangui

Casadu cu badiu di fora

Povu di mesmu sangui

Sem medu da burru cu spora

//

Ta cata lenha na ladera

Pensa n’és vida mariadu

Badja si coladera

Batucu na quintal fincadu

//

Vivi vida na sodadi

Spera maridu qui panha avión

Qui sai na mundo pa busca filicidadi

Maridu qui tevi qui dexa si paixón

//

Sai na tchada bendi fatiota

Tchora lágua sofrimentu

Cosi coraçón nem s’é cu linha fiota

Pa prega padás di sentimentu

//

Mudjer di migranti tem vida complicadu

Ta pói cabeça na cama ca ta durmi

Aves bu ta shinti’l disanimadu

Cu cudjer na boca ca ta cumi

//

Mudjer di migranti ta sufri tchéu

Di noti ta tchora sodadi

Gana di abraça si cretchéu

Pa da’l lua e filicidadi